Home citizenship bill CAA અને NRCના વિરોધમાં ગુજરાતમાં ઠેર-ઠેર દેખાવો, બનાસકાંઠામાં પોલીસને ભાગવું પડ્યું

CAA અને NRCના વિરોધમાં ગુજરાતમાં ઠેર-ઠેર દેખાવો, બનાસકાંઠામાં પોલીસને ભાગવું પડ્યું

493

સિટિઝનશિપ અમેડમેન્ટ એક્ટ (CAA) અને NRCના વિરોધમાં અપાયેલા ગુજરાત બંધને કેટલાક વિસ્તારોમાં જોરદાર પ્રતિસાદ સાંપડ્યો છે. બનાસકાંઠાના છાપીમાં આજે ટોળાંએ પોલીસવાનને ઘેરી લઈને તેને હચમચાવી દીધી હતી. લોકોનો રોષ જોતા પોલીસને આખરે ત્યાંથી ભાગવું પડ્યું હતું. વડગામના ધારાસભ્ય જિગ્નેશ મેવાણીની આગેવાનીમાં દેખાવકારોએ પાલનપુર-છાપી હાઈવે પર ચક્કાજામ કર્યું હતું. આખરે બે કલાકની ભારે જહેમત બાદ પોલીસે માંડ રસ્તો ક્લીયર કરાવ્યો હતો.

ગોધરામાં પણ બંધની સજ્જડ અસર જોવા મળી રહી છે. સવારથી જ શહેરના મોટાભાગના વિસ્તારો સૂમસામ જોવા મળ્યા હતા. કેટલીક જગ્યાએ પ્રદર્શનકારીઓ એકઠા પણ થયા હતા. અમદાવાદ, બનાસકાંઠા અને ગોધરાને બાદ કરતાં ગુજરાતના બાકીના ભાગોમાં બંધની અસર નહીંવત જણાઈ છે. ભરુચમાં પણ આજ સવારથી જ બજારો રાબેતા મુજબ ખૂલ્યા હતા, અને અહીં કોઈ વિરોધ પ્રદર્શન થયાના પણ અહેવાલ નથી.

અમદાવાદના કેટલાક વિસ્તારોમાં પણ બંધની સજ્જડ અસર દેખાઈ રહી છે. મુસ્લિમોની વસ્તી ધરાવતા વિસ્તારોમાં બંધની વ્યાપક વર્તાઈ રહી છે. કેટલીક જગ્યાએ લોકોએ વિરોધ પ્રદર્શનો પણ કર્યા છે. શહેરની સી.યુ. શાહ કોલેજ તેમજ સિટી કોલેજ સામે પણ પ્રદર્શનકારીઓએ દેખાવ કર્યા હતા. જમાલપુર ચકલામાં પણ આજે સવારે વિરોધ પ્રદર્શન થયું હતું. સિટી કોલેજ પાસે દેખાવો કરી રહેલા લોકોને પોલીસે ટીંગાટોળી કરીને અટકાયતમાં લીધા હતા.